Hierdie is ‘n samevatting van Simondium Familiekerk se Pinksterreeks vir 2025. Die reeks het gefokus op die radikale transformasie wat plaasvind wanneer ‘n mens werklik aan Christus behoort – ‘n verandering wat veel dieper gaan as blote karakterverbetering. Die vier preekopnames wat hierdie onderwerpe in diepte behandel, is by hierdie samevatting ingesluit.
Ons flous onsself soms. Ons dink dit is genoeg om ‘n Christen te wees omdat ons karakter effens verander het, of omdat ons goeie bedoelings het. Maar dit is ‘n leuen. Christenskap gaan nie net oor karakter nie — dit gaan oor identiteit. Om aan Christus te behoort, is nie net ‘n verbetering van die ou mens nie; dit is ‘n radikale metamorfose. Dit vra ‘n wedergeboorte, ‘n nuwe identiteit, ‘n ander DNA.
Die krag van DNA
Daar is ‘n ware verhaal van twee vroue: Tamara, ‘n Joodse vrou uit Manhattan, en Adriana, ‘n Katolieke vrou van Long Island. Hulle het mekaar nooit geken nie. Tog, toe Tamara by die universiteit aankom, begin mense opmerk dat sy lyk soos iemand wat hulle al gesien het. Op haar 20ste verjaarsdag daag ‘n onbekende jong man op en staar haar aan: “Jy lyk soos ‘n ou vriendin van my…” Toe ontdek hulle iets ongelooflik: hulle is susters — gebore van dieselfde ma, in verskillende stede, met verskillende agtergronde. Net 20 minute van mekaar af grootgeword, maar eers 20 jaar later ontdek hulle mekaar.
Dít is wat DNA doen.
Wat as God se Gees ook só werk? Wat as God se DNA in ons iets sigbaar en herkenbaar produseer? Wat as geestelike transformasie ons nie net ‘n bietjie beter maak nie, maar werklik anders – Godgelyk – laat lyk?
Jesus sê dit reguit vir Nikodemus (Joh. 3:3):
“As iemand nie opnuut gebore word nie, kan hy die koninkryk van God nie sien nie.”
En Paulus bevestig dit:
“Iemand wat aan Christus behoort, is ‘n nuwe mens. Die oue is verby, die nuwe het gekom.” (2 Kor. 5:17)
Om Christus te volg, is nie ‘n oppervlakkige verandering nie. Dit is nie om ‘n paar slegte gewoontes af te leer nie. Dit is om in wese, van binne af, iemand nuut te word.
Van ruspe tot skoenlapper
Die Griekse woord wat hierdie verandering beskryf, is metamorfose. Dit is die proses waarin ‘n ruspe ‘n skoenlapper word. Dit is innerlike hervorming. Die wortel van die woord in Grieks, morphē, beteken “natuur” of “vorm” – dit verwys na wie jy werklik is, jou diepste identiteit.
Paulus gebruik hierdie woord in Filippense 2 om Jesus te beskryf:
“Hy wat in die gestalte (morphē) van God was, het Homself verneder…”
Jesus verander van gelyk-aan-God tot dienaar-van-mense. Dit is nie net uiterlike aanpassing nie; dit is ‘n metamorfose wat in die diepste ratwerk van identiteit begin.
Wanneer daardie metamorfose begin gebeur in ons, begin ons anders leef. Ons gedra ons nie soos voorheen nie. Ons dink anders, ons voel anders, ons reageer anders.
Die vrug van ‘n nuwe natuur
In Efesiërs 4 beskryf Paulus hoe hierdie nuwe mens lyk. Hy gee nie vir ons ‘n teologiese verhandeling nie, maar ‘n praktiese skets van ‘n veranderde lewe – en dit begin by ons gesindheid teenoor ander:
1. Nederigheid
Nie vals beskeidenheid nie, maar ‘n diep besef dat ek nie die middelpunt is nie. Nederigheid sê: “Dit is reg as dinge nie gaan soos ek dit sou verkies nie.” Dit is die gesindheid van Christus wat Homself verneder het tot die kruis.
2. Sagmoedigheid
Nie swakheid nie, maar “krag onder beheer”. Soos ‘n getemde perd, bly jy sterk – maar jy staan onder beheer van Christus. Jesus kon ‘n leër van engele roep, maar Hy het Homself ingehou. Só lyk ware sagmoedigheid.
3. Geduld
Nie net passiewe wag nie, maar volgehoue vertroue in moeilike mense en situasies. Dit is om ‘n “lang lont” te hê. Geduld sê: “Ek wag… en ek leef reg terwyl ek wag.”
4. Verdraagsaamheid in liefde
Dit is om saam met mense te leef wat jou irriteer. Dit is om nie te sê: “Hy moet verander” nie, maar om te bid: “Mag ek deur hierdie persoon meer soos Christus word.”
Hierdie vier eienskappe is nie opsioneel nie. Hulle is die natuurlike vrug van God se Gees in ons. Hulle wys dat ons nuut gebore is. Dat ons skoenlappers is.
Die kweekhuis van geloof
Maar hier’s die geheim: jy kan nie hierdie dinge alleen aanleer nie. Jy leer nie nederigheid in isolasie nie. Jy leer dit in die kerk, in die familie, in konflik, in ‘n selgroep. Geestelike groei is nie ‘n solo-projek nie – dit is ‘n gemeenskaplike werk.
Efesiërs 4:3-6 sê:
“Lê julle daarop toe om die eenheid wat die Gees bewerk het, te handhaaf deur in vrede met mekaar te leef…”
Een liggaam. Een Gees. Een geloof. Een Vader.
As God jou wil leer hoe om meer soos Jesus te wees, plaas Hy jou nie in isolasie nie. Hy plaas jou in ‘n gemeenskap waar mense verskil, irriteer, en struikel – want dáár word Christus se beeld op jou afgestempel.
Die leuen van “Ek kan nie verander nie”
Soveel mense glo: “Ek is maar soos ek is.” Of: “Ek probeer al jare, maar ek kan nie verander nie.” En dit is waar – jy kan nie, in jou eie krag nie. Self-verbetering help nie. Nuwejaarsvoornemens vervaag. Maar ware verandering kom van Christus.
Efesiërs 4:7 sê:
“Aan elkeen van ons is ‘n genadegawe gegee…”
Die opgestane Christus gee nie net ‘n bevel om te verander nie – Hy gee die krag, die genade, die middele. Die Gees is nie ‘n kosmetiese toevoeging tot jou lewe nie. Hy is ‘n nuwe bron van lewe in jou, wat jou van binne af nuut maak.
Wys jou DNA
Die Bybel sê nie net: “Jy is ‘n Christen” nie. Dit vra: “Wys dit.”
Wys dit in jou gesindheid. In jou reaksie. In jou verhoudings. In jou lewe.
As jy werklik aan Christus behoort, het jy Sy DNA. En DNA lieg nie.
Soos met Tamara en Adriana, sal ander mense raaksien:
Jy lyk soos iemand wat hulle ken.
Jy lyk soos Jesus.
Sal jy ook soos Augustinus kan antwoord wanneer die dinge van die ou lewe jou roep: “Dit is nie meer Augustinus nie”?
By